ridiculum vitae

Curtiu de Daniel Martínez Lara

Esto nun ye una pipa, pintáu por Rene Magritte en 1929

Los Ángeles, County Museum

Definitivamente los mios herues nun s'asemeyan a los que mos apurren nes pelicules de guerra. Quiciabes seya por llevar la contraria como con too lo que faigo, o porque soi tan fatu que nun se valorar cuando'l protagonista mata bien mataos a cuatro chinos. Y si digo bien mataos ye porque ya teo oyío a intrépidos reporteros facíendo valoraciones tan suxetives como; "4 muertos graves y 3 leves".

Robert Capa, el mesmu reporteru que fizo la semeya de la muerte d'un milicianu , atopó durante la guerra civil a un d'estos herues. La peligrosa misión del nuesu Rambu yera facer rir a los nenos que s'abellugaben de les bombes nún refuxu de Barcelona.

[...] Pasos llargos yera un municipal de Xixón que-y punxo una multa a la muyer por sescudir les alfombres fuera d'hora. [...]. Pasos llargos hai que suponer qu'asistió personalmente a la sescudida pública de les sos alfombres, porque nun multaría por dizques. Foscón y tiesu, vio nevar la povisa que, poques hores enantes, espardíen per casa les sos pantufles de piel de fantasía. Equí ye cuando un paisanu se retrata: podía llevantar la vista p'aquelles altures comprometíes y esclamar, como'l que nun quier la cosa:" Paez que tamién hoi va llover", dar media vuelta y azotase a calmar les rabies cazando Mercedes mal estacionaos.

Pero non: [...] , él ye Pasos Llargos. Echa mano de la llibreta y , mientres la abre, parsimoniosu, mira'l reló y anota cai, fecha y hora. Dexa caer, al alto la lleva, aquello de: "¿Nun sabe usté, señora, qu'esiste un horariu determináu pa sescudir a la vía pública?" Esto fue lo que fexo y hai que pensar que, pa tomar una decisión tan dramática ( y lo de menos , ya m'entienden, ye ponese multa contra'l propiu sueldu), fai falta ser mui paisanu [...]. Amás que, supónse, debieron mediar presiones esternes.

"Mira a la tu muyer, Pasos Llargos, mírala cómo sescude. ¡Si fuera la mia...!".

Qué fácil yera, entós, aducir ceguera transitoria o perdese nuna sutil disquisición sobre si una muyer que sescude alfombres na ventana, en tanto en cuanto desempeña esa actividá, puede considerase esposa d'un municipal de serviciu, visto que ye pública la inesistencia de cohabitación in situ atque in tempo. Entiéndase : "Nun ye la mio muyer: agora soi municipal, non esposu".

[...] Asina qu'escribe la multa y, anque tien les llaves de casa, pica al timbre pa que la muyer-y abra. Sube les escaleres (nun sé por qué, pégame que nun había ascensor) y enfréntase a la señora a la puerta'l pisu. Apúrre-y la multa y ella, difícil d'impresionar, porque ye la que-y plancha l'uniforme, garra'l papelín y pósalu ehí mesmo, enriba la mesita del recibidor, pa qu'él lu alcuentre cuando llegue a comer. Y él marcha ufanu, pensando que la honradez tien un preciu; y ella quédase con que sal caro ser faltosu. Ye la épica contra l'ensayu.

Sacáu de l'últimu volador, de Milio Rodríguez Cueto, nel que se atropen los sos escritos nel periódicu La Nueva España ente los años 2000 y 2004.

Asoleyáu por vtp editorial.

tan real como la vida mesma, ¿o tu nun ties zunes cuando xuega'l to equipu?

quien mos diba dicir fai 15 años qu'agora díbemos tar asina, tanto Uviéu como Sporting.

Un país onde la casa cai l’horru la ponte
El molín la ilesia l’home tamién cai ..

¡Xuan Bello escaeció'l deporte! futbol, baloncesto, balonmano... too cayó yá nesti país.

Soi de la opinión de qu'el meyor humor nun s'alcuentra nos chistes, sinon na rialdá. Porque amás de rir con ello, munches vueltes fai que quedes rucando coses que d'otra miente nunca nun te hubieres aparao a pensar. Camúdes-yos dalgunes pingarataes y faes de los oxetos d'avezu daqué nueu dafechu.

Equí vos apurro dalgo qu'atopé caleyando per Pontevedra.

... votara tol mundiu en blancu?

Non, nin muncho menos quiero dicivos que facer col vuesu votu, Namái falavos d'un mou d'escribir.

Afitándose nuna idega a mediu camín ente la utopía y la distopía, Jose Saramago (la pintora Sara Mago pa otros...) entama dalgunos llibros, ún d'ellos Ensayu sobre la llucidez, onde talanta eso mesmo, ¿qué pasaría si la mayoría de votos fueren en blancu?.

 

Quiciabes la costume que tien Saramago de nun emplegar puntos nin dixebrar párrafos fai que tardes un puquiñín mas en garrar el ritmu de llectura, pero les hestories son tan bones que hasta que nun lu acabes nun yes quién a aparar.

Esti llibru ye la continuación del Ensayu sobre la ceguera, onde la xente ensin saber por que, entama a quedase ciega, y nun-yos queda otra que recurrir a los sos primitivos instintos pa sobrevivir.

Nun pueo escaecer el que me paez el meyor en cuantes a esti plantegamientu; Les intermitencies de la muerte. Nesta ocasión la muerte se mos pon en fuelga, nún mundiu como esti ¿Tien razón de ser la euforia inicial? ¿De que diben vivir les aseguradores y mélicos? ¿Qué xacíu tendría una ilesia ensin vida etenra que prometer?

Si quies que te faigan pensar un ratín (nun mos vien mal dacuando) equí t'apurro Un premiu Nobel capaz d'ello.

 

Nún folleru alcontré l'amor

Tinía los güeyos esbillaos.

La voz cimblante.

El cuerpu oriciáu.

 

Peles pocilgues afalaba.

Peles cantarielles xorrecía.

Polos antros amoriaba...

 

Esti ye l'amor que nun se fixo.

L'amor perdíu.

L'amor nun declaráu.

Dir toos a facer l'amor.

Dir toos a remanecelu.

 

Dexái, amantes, les alcobes,

dexái, monxes el llupanar.

Salíi, maniacos, del oligopoliu.

 

Que naide seya de naide

pa que toos faigan l'amor.

 

Manuel Asur

Tornáu al castellanu nos comentarios

L’otru día atopé una noticia percuriosa; Un británicu gastó tolos aforros tres un diagnósticu fallíu de cáncer, el bon home paez ser que quedóse namái col trax col que diba ser enterráu. Esto fizo que m’alcordara d’otru casu paecíu enforma, magar qu’al otru paisanu-y empaquetaben un tumor cerebral y que nun se dedicó a esfrutar de los sos caberos momentos, sinon qu’entamó a escribir noveles.

Y ye qu’una obra tan sublime como La naranxa mecánica nun podía tener un orixe convencional. La so adautación al cine fecha por Kubrick roza la perfección en casi tolos aspeutos, tres de una película que paez ser solo violencia de baldre, alcuéntrase un mensax tres d’otru, namái remembrar la frase; "Les carceles deben tener los sos puestos llibres pa los prisioneros políticos".

Ye un elloxu a la llibertá d’un mou estremu, a la braera llibertá; poder esbillar ente facer el bien o'l mal. Llogra daqué perdificil; que se sienta simpatía pol protagonista. Magar qu’él seya cruel, el mundiu que lu arrodia entá ye pior.

Dan ganes d'empecipiar a cantar "cantando baxo la lluvia" y baillar la peculiar "coreografía" d'Alex. Esta escena que ya de por sí serviría pa definir tola película nun taba nel guión, Kubrick mandó-y Malcolm McDowell que cantara dalgo de mientres la facía, y esti namái que conocía esta lletra.

El soníu, caún de los planos d'imaxe au s'amuesa un futuru percollorista, asina como l'emplegu de la xerga inventada nadsat faen que seya un auténticu regalu pa los sentíos.

Porque la película ye una ayalga, al egual qu’un bon escultor nun crea la so obra, sinon que sabe que siempres tuvo ehí, aguardando dientro’l mármol fasta que daquién l’atopase, Kubrick tampoco crea una película, solo graba daqué que flúi con total naturalidá.

Pa saber más de la película