ridiculum vitae

Una de les primeres alcordances que teo foi una tarde qu'acompangué al mio tiu a ver la esposición del so collaciu "Ave". Nun sedría raro qu'esto pasare desapercibíu pa la mio memoría, a la fin de cuentes casi toles selmanes díbemos a dar una vuelta y malapenes teo alcordances d'ello. Pero un pantalón vaqueru apegáu a un cuadru yera daqué que nun-y podía ser indiferente a la coruxía d'un nenu pequenu. Inda m'alcuérdo como si fuere güei de lo que se me crució pela tiesta ¿Y eso ye arte...?

Si m'atrevo a recomendavos esta esposición, asitiada cabo la capiella de san Llorienzu áu pasóme aquello, ye porque conociendo la obra d'Avelino de xuru qu'al egual que pasóme a mín aquel día, a vosotros tampoco vos pasará desapercibida.
Y ye que delantre les sos obres se tien la sensación de tar ante daqué nueu, distinto a tolo visto enantes, ¿o acaso talantabes que se podíen facer escultures de cello ?.

Darréu vos pongo una pequeña reseña de la esposición sacada de la páxina d'Espacio líquido;

En “Arde lo que será. Fuego, camina conmigo” Avelino Sala reflexiona sobre la sociedá d'anguaño y el calter acomodaticiu del home, el miéu a la cuerda floxa, a les incertidumes del mañana y a la abonda preocupación por controlar lo incontrolable.

La espera, 2006

El fútbol y la pelota arrolada en llaparaes conviértense na iconografía básica del so trabayu. El deporte yel caldu de cultivu pa los nuevos dioses, los nuevos gladiadores, espeyos nos que la sociedá se mira y amataga la so incertidume. Quiero ser como… pa nun tener que ser yo;
comodidá y simpleza. El balón que comburia yel riesgu, un toque y pasu atrás afuxendo de les posibles quemadures.

Noticia completa

La esposición tará n'Espacio Líquido hasta'l 23 de Xunu

Cai Xovellanos nº 3 baxu, Xixón.

Páxina d'Avelino

Michelangelo Merisi, cansáu de la visión idealizada que carauterizaba a la pintura renacentista, decidió que la so obra debería ser real, pintaría bodegones, rostros y cuerpos ensin suxetividá dala, solo como los percibía'l güeyu humanu. Pa ello cuntó con un aliáu al que quedaría xuníu pa siempres; el claruescuru.

N'oposición a la mayoría d'artistes, Caravaggio nun se contentó con dexanos solo la so obra artística, sinon que llevó una vida digna d'un guión de película.

Tres pasar la mocedá en Milán decide viaxar a Roma, ellí tuvo implicáu en delles engarradielles. Foi arrestáu por portar armes coles que retaba a los pintores que-y querien facer la competencia. Un d'esos pintores foi víctima d'una bona cuelma tres criticar la obra de Caravaggio.

N'otra ocasión, viéndose acusáu de convivir cola prostituta que-y sirvía de modelu, Caravaggio axestó-y dellos fachazos al so demandante, esto fizo qu'afuxera pa Génova. Pero la víctima sobrevivió y sorprendentemente retiró los cargos, polo que pudo tornar a Roma.

Por embargu, la siguiente víctima nun corrió la mesma xorra. Caravaggio xugaba a la pelota col xefe d'una banda, cuando tres d'una discusión Caravaggio lu apuñaló, provocando-y la so muerte. Condenáu a muerte nun-y quedó otra qu'afuxir de Roma definitivamente.

La polémica en Roma nun solo-y arrodió pol so calter violentu, l'erotismu qu'enllenaba casi toles sos obres chocaba dafechu col so principal mecenes, la ilesia. Magar que la so obra toviera enllena d'esnudos masculinos, el mayor escándolu portó-y con "La Muerte de la Virxe", au amosábase a la mesma col vientre hincháu, ya que l'artista emplegó como modelu al calabre d'una prostituta embaranzada qu'hebía apaeció afogada nel Tiber.

Tres d'un tiempu en Nápoles, Caravaggio recae en Malta, onde torna a la so posición social amás de ser nomáu caballeru, pero una nueva engarradiella con otru caballeru prevocó que fuera apresáu. Gracies a unos desconocios pudo esmucise y colar pa Sicilia.

Pero la tranquilidá tampoco-y taba esperando nesti nuéu llugar, ya que foi denunciáu abondes vueltes por molestar a los alumnos d'un profesor de gramática.

Nuevamente en Nápoles, el nuesu protagonista recibe una brutal cuelma per parte de xente unviada pol caballero de Malta con quien había tenío l'enfrentamientu. Tres d'esto, desfiguráu y maltrechu fai una pitición de perdón al papa pa poder tornar pa Roma.

De la qu'empobinaba a Porto Ercole pa partir a Roma, ye reteníu, motivu pol cual pierde'l barcu. El 18 de xunetu de 1610 muerre a los 39 años nun sablón solu dafechu.

Con esta vida nun ye mui dificil entender el porqué d'una obra tan curtia, y sobre too porque la mayoría de los sos cuadros tan nes ilesies d'estes ciudaes.Equí n`España que yo sepia hai ún nel Muséu del Prado "David vencedor de Goliat" y otru nel Thyssen "Santa Catalina de Alejandría".

Pa saber mas

Lleí fai poco, que si tuviera ñacío en Cataluña o Euskadi tendría otru reconocimientu públicu. Nun pueo mas que tar d’alcuerdu con esto, porque lo que Toli-y da a la nuesa música nun ye cenciello d’atopar n’otros músicos.

La idega de musicar poemes dalgo que paez tan normal y que ya facía Nuberu, tien muncha importancia, sobre too pa una lliteratura tan piquiñina como la de nueso.

Poques formes d’averase a la obra d’un autor hai meyores qu’esta, porque si te presta un cantar, el pasu pa mercar un llibru de daquién ya nun sedría tan grande.

Nel Hotel Silken de Madrid por exemplu, l'arquiteutu Jean Nouvel tuvo la gran idega d’enllenar la fachada con frases tornaes a dellos idiomes d’un poema de Paul Eluard tituláu Liberté.

Ye una pena, pero o la busques, o la poesía nun apruz, nengún bancu t’unvía les factures xunto poemes de Berta Piñán, nin los carniceros tienen la costume d’envolver la carne coles fueyes de Paniceiros.

Ya nun ye solo'l fechu de pone-yos música, tamién hai qu'igualos, y esto ye algo que Toli fai como naide, da-yos el toque de mandolina o violonchelo xustu pa facer de cada cantar dalgo perespecial.

Azul y gris (premiu al meyor cantar del añu), Na fronteira, Carretera solitaria... ensin lletra per sigo mesmo, ya podríen considerase auténtiques obres d'arte.

Páxina Oficial

Con un nome solo superáu polos publicistes de vueling col grandiosu (from 30 euros trayecto todo included, all destinos), fai dellos años yá, entamaron a construyir “cuatro torres business area”, o lo que ye lo mesmo, el pelotazu de la ciudá deportiva del Madrid.

Ellí llantaron 4 rascacielos diseñaos por arquitectos pernomaos, ente los que s’atopa Normal Foster.

La noticia de güei ye que yá hai proyeutu pal palaciu de congresos que completará’l conxuntu. Sedrá de los mesmos que fixeron el Musac de Lleón, o l’archivu provincial de Madrid, un edificiu non mui conocíu pero perafayaizu, afitáu no que yera una vieya fabrica de cerveces.

Muséu de Lleón

Estéticamente reconozo que ye difícil d’aceutar, sigue paeciéndome un quesu, pero lo bono d’estes coses ye que consiguen que nun-y seya indiferente a naide.
Ehí onde lu veis algamará 120 metros d’altor, el nome esta vegada nun lo rucaron abondo, palaciu de congresos princesa Letizia, en fin...

Bono, la verdá ye que inda nun se pa que toi faciendo esto, quiciabes taré peraburríu,nun se.
De toes formes dacuando diré amosándovos coses, casi toes caxigalines, d'arte, cine, lliteratura... lo que tea pruyéndome nesi momentu.